თბილისი (GBC) - აჭარის მთავრობა მწვანე კონცხზე ყოფილი აგრარული უნივერსიტეტის ორ შენობას და მათზე დამაგრებულ მიწას ასხვისებს.

აუქციონზე, რომელიც 3 თებერვალს დასრულდება, ქონების საწყისი ფასი 4,5 მლნ ლარია, „ბიჯი“ 100 000 ლარს შეადგენს. აუქციონზე დაფიქსირებული თანხიდან 3 მლნ ლარი მყიდველმა  ბათუმის სახელმწიფო უნივერსიტეტის უნდა გადაურიცხოს, დანარჩენი აჭარის ბიუჯეტში უნდა შეიტანოს. ამასთან,  ინვესტორმა ადგილზე 5 წლის ვადაში არანკლებ 5 მილიონი ლარის ინვესტიცია უნდა ჩადოს.

გაზეთი „ბათუმელები“ ანონიმ, თუმცა ინფორმირებულ წყაროზე დაყრდნობით წერს, რომ ტერიტორიის ყიდვას  ბიძინა ივანიშვილი აპირებს.

გამოცემა აღნიშნავს, რომ  ადგილზე  ექს-პრემიერის პროექტის ე.წ. „პანორმა ბათუმის“ შესაძლო განხორციელებაზე არაოფიციალურად საუბრობენ.

აღსანიშნავია, რომ მიმდებარედ „ბიზნეს დეველოპმენტი“, რომლის მფლობელი იურიდიული კომპანია „ნოდია, ურუმაშვილი და პარტნიორებია“ Magnolia – Resort & SPA-ს აშენებს.

ეს ადგილიც კომპანიამ სასტუმროს აშენების პირობით  აუქციონზე შეიძინა, თუმცა ვინ არის რეალურად ინვესტორი იურიდიულ კომპანიაში მაშინ არ გაუმჟღავნებიათ.