თბილისი (GBC) - პროგრამა „აწარმოე საქართველოში" ფარგლებში კიდევ ორი ახალი საწარმო შეიქმნება.

საქართველოს პრემიერ-მინისტრის ინფორმაციით, დიდ ლილოში ამოქმედდება სამშენებლო მასალების მწარმოებელი საწარმო, სადაც 3,5 მილიონ ლარზე მეტი ინვესტიცია განხორციელდება და სახელმწიფოსგან სიმბოლურ ფასად გადაეცემა 1 ჰექტარამდე მიწის ნაკვეთი. ინვესტირებას კომპანია "ნეოსტარი" ახორციელებს. 

მეორე პროექტი არის მინისა და მინის ნაწარმის მწარმოებელი საწარმო, რომელშიც 1 მლნ ლარამდე ინვესტიცია განხორციელდება.  

„ნეო გლასს“  სახელმწიფოსგან ქალაქ თბილისში, აგრარული უნივერსიტეტის მიმდებარედ 1 006 კვ.მ. არასასოფლო-სამეურნეო დანიშნულების მიწის ნაკვეთი გადაეცა.  კომპანია მინის საწარმოს აშენებას უზრუნველყოფს და 2 წლის განმავლობაში 10 000 მ2 უსაფრთხო, გამტკიცებულ ან მრავალფენოვანი მინის წარმოებას შეძლებს.

გიორგი კვირიკაშვილის განმარტებით, მთავრობა ქვეყანაში წარმოების განვითარების ხელშესაწყობად მთელ რიგ ნაბიჯებს დგამს.

„მთავრობა დამწყებ ბიზნესს ეხმარება რამდენიმე მიმართულებით: სახელმწიფოს ხელში არსებული ქონების უსასყიდლოდ გადაცემა, სესხის სუბსიდირება სტარტაპის, ანუ დაწყების პერიოდში 2 წლის განმავლობაში და კომერციულ ბანკებში მოთხოვნილი გირაოს ნახევრის უზრუნველყოფა," - განაცხადა პრემიერმა.