თბილისი (GBC) - კოპერატივი „არაგველების“ წარმოებული დეკას ჩაი დახლებზე 1 თვეში გამოჩნდება, - ინფორმაციას პორტალი „მთის ამბები“ ავრცელებს.

პორტალის ცნობით, კოოპერატივი, რომელიც სოფელ ბარისახოშია დაფუძნებული, მთის ველური მცენარეებისგან რამდენიმე სახის ჩაის ამზადებს

„ამ ეტაპზე სამი სახის ჩაი გვაქვს: „ალპური ლეგენდა“, რომელიც დეკას ფოთლებისგან არის დამზადებული, „ტკბილი სიზმარი“, რომელიც დეკას ფოთლების და პიტნის ნაზავია და „მთის თაიგული“. „მთის თაიგული“ 10 სხვადასხვა მცენარის ნაკრებია. მათ შორის არის: კრაზანა, თავშავა, დეკა, პიტნა, ასკილი, სალბი, ბეგქონდარა, მოცვი და პანტის ჩირი. რამდენიმე თვეში წარმოებაში კიდევ 4 სახის ჩაის ჩავუშვებთ. ძალიან საინტერესო კომბინაციები გვექნება: დეკას ფოთოლი და დეკას ყვავილი, ჟოლო და დეკა, პიტნა და დეკა. ახლა კოლოფების დაბეჭდვას ველოდებით და პროდუქციას თბილისის მაღაზიების ქსელში სავარაუდოდ, ერთ თვეში გავიტანთ”, - განაცხადა კოოპერატივ „არაგველების“ გამგეობის თავმჯდომარე ნათია ფსუტურმა.

1 კოლოფში 50 გრ ჩაი იქნება დაფასოებული. 1 კოლოფი ჩაის ფასი კი 5 ლარიდან დაიწყება.