თბილისი (GBC) - გლობალურმა ეკონომიკის კრიზისმა უმდიდრესი ადამიანები უფრო გაამდიდრა, - აცხადებს საერთაშორისო გაერთიანება OXFAM კვლევაზე დაყრდნობით.

ექსპერტებმა დაადგინეს, რომ 8 უმდიდრესი ადამიანის ქონება ზუსტად იმდენივეა, რამდენსაც დედამიწის ღარიბი მოსახლეობის  50% ფლობს.

უფრო კონკრეტულად ბილ გეითსის ($75 მლრდ), ამანსიო ორტეგას ($67 მლრდ), უორენ ბაფეტის (60,8 მლრდ), კარლოს სლიმის ($50 მლრდ), ჯეფ ბეზოსის ($45,2 მლრდ), მარკ ცუკერბერგის ($44,6 მლრდ), ლარი ელისონის ($43,6 მლრდ) და მაიკლ ბლუმბერგის ($40 მლრდ) ქონება ჯამში 426 მილიარდია და ამდენივეს ფლობს დედამიწაზე მცხოვრები 3,6 მილიარდი ღარიბი.

OXFAM-ის ცნობით, 2009-2016 წლებში 793 ადამიანის ჯამური კაპიტალი ყოველწლიურად 11%-ით იზრდებოდა და 2,4 ტრილიონიდან 5 ტრილიონამდე გაიზარდა. თუ ზრდის ძველებური ტემპი  შენარჩუნდება, უახლოეს 25 წელში დედამიწაზე პირველი ტრილიონერი გაჩნდება.

ანგარიშის ავტორები აღნიშნავენ, რომ მდიდრების კიდევ უფრო გამდიდრება გლობალური სიღარიბის გაღრმავების ფონზე ხდება. OXFAM-ის ცნობით, მხოლოდ ბოლო წელს მოსახლეობის ნახევარზე მეტის წილი გლობალურ სიმდიდრეში 0.7-დან 0,2%-მდე შემცირდა.