თბილისი (GBC) - გაზპრომთან ახალი პირობებით ხელშეკრულების გაფორმას მოღალატეობად აფასებს პარლამენტარი რომან გოცირიძე. 

მიიჩნევს, რომ  ხელისუფლება მოქცეულია რუსეთის პოლიტიკური გავლენის ქვეშ. 

"ყველა არგუმენტი, რაც შარშან ჰქონდა მთავრობას „გაზპრომთან“ დათმობაზე წასვლის გასამართლებლად, ამოწურულია. შაჰ-დენიზის საერთაშორისო კონსორციუმმა 500 მილიონი კუბური მეტრი გაზი გამოგვიყო დამატებით და ბაქო-თბილისი-ერზრუმის გაზსადენშიც გატარების უფლება მოგვცა. მიუხედავად ამისა, მთავრობამ კაპიტულაცია მოახდინა. აქ იკვეთება პირადი ინტერესებიც და ამას ადრე თუ გვიან ფარდა აეხდება", - წერს დეპუტატი Facebook-ში თავის გვერდზე.

აღნიშნავს, რომ რუსეთის შემდგომი სამიზნე თბილისის გაზგამანაწილებელი სისტემა იქნება, რომელიც „ყაზტრანსგაზის“ საკუთრებაშია, ამის შემდეგ კი რკინიგზა.

"ესაა მცოცავი ეკონომიკური ანექსია", - წერს გოცირიძე.

შეგახსენებთ, მთავრობა დათანხმდა გაზპრომ - ექსპორტის შემოთავაზებას ტრანზიტის საფასურის მონეტიზაციაზე. რა თანხას მიიღებს საქართველო სომხეთში რუსული გაზის გატარების სანაცვლოდ არ დაკონკრეტებულა.