თბილისი (GBC) - თურქეთი უცხოელი ტურისტების ნაკლებობაზე ჩივის.

პოპულარული ტურისტული კურორტის, ანტალიის ადმინისტრაციაში ამბობენ, რომ უცხოელი ტურისტების რაოდენობა 2016 წელს 2004 წლის მაჩვენებლამდე შემცირდა და მხოლოდ 6 მლნ შეადგინა, რაც 43%-ით ნაკლებია 2015 წლის მაჩვენებელზე.

ლენტა.რუს ცნობით, რუსეთიდან ტურისტების რაოდენობა 7-ჯერ, 500 000-მდე შემცირდა, გერმანიიდან 3-დან 1,9 მილიონამდე.  

ბოდრუმს გასულ წელს 453 ათასი დამსვენებელი სტუმრობდა, 44%-ით ნაკლები წინა წელთან შედარებით. მათ შორის რუსეთიდან 91%-იანი კლებაა.

ბოლო 16 წლის განმავლობაში პირველად, ტურისტების ნაკადი შემცირდა სტამბულშიც. ქალაქმა 9,2 მლნ უცხოელ ტურისტს უმასპინძლა, წლიურად 26%-იანი ვარდნაა.

ტურიზმის ინდუსტრიაზე უარყოფითად აისახა თურქეთში დაძაბული პოლიტიკური ვითარება, გადატრიალების მცდელობა და გახშირებული ტერაქტები, ასევე რუსეთთან დაძაბული ურთიერთობა.