თბილისი (GBC) - გასულ წელს ლარი დოლარის მიმართ 25 თეთრით გაუფასურდა, 10,4%-ით. 2013 წლის 1 იანვრიდან კი, 59.8 %-ით.

წლის განმავლობაში ლარის გაცვლითი კურსი მკვეთრი ამპლიტუდით ხასიათდებოდა.  გასუფასურების ორი მნიშვნელოვანი ტალღა დაფიქსირდა, წლის დასაწყისში იანვარ-თებერვალში და წლის ბოლოს ნოემბერ - დეკემბერში.

ყველაზე მყარი ლარი ივნისში იყო. 10 ივნისს ლარი დოლარის მიმართ 2.1272 ნიშნულამდე გამყარდა.

2016 წელი ისტორიაში ლარის „შავი ხუთშაბათითაც“ შევა - ეროვნული ვალუტა ბაზარზე ერთ დღეში ერთბაშად 17 თეთრით დაეცა, ოფიციალური გაცვლითი კურსის მიხედვით, 5 თეთრით. პანიკა მთელ დღეს გაგრძელდა - ლარი/დოლარის კურსი ყოველ საათში იცვლებოდა.  Bloomberg-ის სავაჭრო სისტემაში ლარი/დოლარის გაცვლითი კურსი 2.66 ნიშნულამდე დაეცა, 16:11 საათისთვის კი, ლარმა გამყარება დაიწყო და 2.5750 ნიშნულზე ჩამოვიდა. 

წლის განმავლობაში ისტორიული კურსი 22 დეკემბერს დაფიქსირდა 1 დოლარის ფასი 2,7846 ლარი გახდა.

კურსი თავისუფალ მცურავ რეჟიმში დარჩა. ეროვნულმა ბანკმა ბაზარზე გარკვეული ინტერვენციები განახორციელა, სულ 24-ჯერ, იყიდა 278 მლნ აშშ დოლარი და ოდნავ მეტი, 280 მილიონი გაყიდა.