თბილისი (GBC) –  აშშ-ის 45 -ე პრეზიდენტად ტრამპის შედგომის შემდეგ უპრეცედენტოდ გამყარებული  აშშ დოლარი,  საქართველოს ღია ეკონომიკის მცირე მასშტაბი და არჩევნების შემდგომი სინდრომი, რასაც ეკონომიკური სუბიექტების დაბნეულობის გამოვლინება ახასიათებს -  ლარის გასაჭირზე ეროვნული ბანკის პრეზიდენტმა  TV პირველის წინასაახალწლო  ეთერში  ისაუბრა, უპასუხა  „ბიზნესკონტრაქტის“ კითხვას - „რა ჭირს ლარს“.

კობა გვენეტაძემ  ურთიერთმოქმედ გარე და შიდა ფაქტორებს შორის საბიუჯეტო პოლიტიკა გამორიცხა. აღნიშნა, რომ  ბიუჯეტის არათანაზომიერი ხარჯვის  2013 წლის გაკვეთილი მთავრობამ გაითვალისწინა და  ლარის  გაუფასურების ეს მდგენელი მთლიანად  გამორიცხა.

დედოლარიზაციის  პირველ შედეგებს სებ-ის პრეზიდენტი კანონზომიერად მომავალ წელს ელის. სავალუტო რისკების შემცირების მიზნით დაწყებული კამპანია თანდათანობით შემდგომ წლებში  უფრო შესამჩნევი გახდება და შედეგიც დადგება, როცა მოსახლეობის განკარგვადი შემოსავალი უფრო მეტი იქნება, უფრო  პროგნოზირებადი, უფრო დაცული და მხოლოდ ინფლაციის ტრენდის მოლოდინებით  იქნება შესაძლებელი ანალიზი.