თბილისი (GBC) -  Forbes -ი საქართველოს ექს-პრემიერის, ბიძინა ივანიშვილის მიერ თავისი კოლექციიდან სამი ნახატის გაყიდვაზე იტყობინება, 112 მლნ აშშ დოლარად.  

გავლენიანი ჟურნალის რუსული რედაქციის ცნობით, წელს  Christie's-ის აუქციონებზე მილიარდერი ქართველის საკუთრებაში მყოფი 4 ნახატი იყო გატანილი. 

გამოცემა აღნიშნავს, რომ ივანიშვილმა  კოლექციის განახლება დაიწყო. ნოემბერში ბიზნესმენი შეელია დე კუნინგის ერთ-ერთ თავის საყვარელ ნამუშევარს, რომელიც 66,3 მილიონ აშშ დოლარად გაიყიდა. Forbes -მა ისიც გაარკვია, რომ ნახატვის გაყიდვამდე ივანიშვილმა დე კუნინგის ნაკლებად ცნობილი ნახატი 12 მილიონ დოლარად შეიძინა.

Forbes-ის ცნობით, ნოემბერშივე   Christie’s -ის აუქციონზე, როკფელერ ცენტრში $18,4 მილიონად  გაიყიდა პაბლო პიკასოს "ადამიანი მილით", რომელიც ამშვენებდა თბილისში ივანიშვილის ბიზნეს ცენტრის საბილიარდოს.

კიდევ ორი ნამუშევარი ლონდონში Christie’s-ის აუქციონზე ივნისში გაიტანეს. ამ აუქციონზე მთავარი შედევრი იყო ლუსიენ ფრეიდის ნამუშევარი "იბი და მისი მეუღლე", $24 მილიონად, ამ სურათის ბედი უცნობია. 

თუმცა, ამავე აუქციონზე  ივანიშვილმა მომგებიანად გაასხვისა ფრენსის ბეკონის ერთ-ერთი ნამუშევარი "მწოლიარე ფიგურა საინექციო შპრიცით, ვერსია № 2". ნამუშევარი 27,1 მილიონად გაიყიდა. 

აღსანიშნავია, რომ ეს მხოლოდ მცირე ნაწილია ბიძინა ივანიშვილის კოლექციიდან, რომელშიც ბიზნესმენს 1 მლრდ აშშ დოლარზე მეტი აქვს ჩადებული. მის საკუთრებაში რჩება ერთ-ერთი ყველაზე ძვირადღირებული ტილო პაბლო პიკასოს "დორა მაარი კატასთან ერთად", ივანიშვილმა ეს ნახატი 2006 წელს 95,2 მლნ აშშ დოლარად იყიდა.

შეგახსენებთ, Forbes-ს ივანიშვილის ქონება 4,8 მილიარდად აქვს შეფასებული.