თბილისი (GBC) - ბათუმი(ანაგისა)-ახალციხის საავტომობილო გზის ხულო-ზარზმის (ლოტი I) მონაკვეთის რეაბილიტაცია დაიწყება.

საავტომობილო გზების დეპარტამენტში გზის სარეაბილიტაციო სამუშაოების საზედამხედველო მომსახურების გასაწევად, ტექნიკური და ფინანსური წინადადებები მოკლე სიაში გასულმა ხუთმა საკონსულტაციო კომპანიამ წარმოადგინა.

მოხდა ტექნიკური წინადადებების გახსნა, რომელთა შეფასების შემდეგ მხოლოდ იმ კომპანიების ფინანსური წინადადებები გაიხსნება, რომლებიც ტენდერით დადგენილ მინიმალურ ბარიერს გადალახავენ.

ბათუმი(ანაგისა)-ახალციხის საავტომობილო გზის ხულო-ზარზმის მონაკვეთი სულ 47 კილომეტრიანია და პირველ ეტაპზე გზის 29 კილომეტრიანი მონაკვეთი (კმ0-კმ29) აშენდება.

პირველი ეტაპის მშენებლობას, არაბეთის ეკონომიკური განვითარების ქუვეითის ფონდი (KFAED) აფინანსებს.

პროექტის განხორციელების შედეგად აღნიშნული მიმართულებით გადაადგილების დრო 1.5 საათით შემცირდება.