თბილისი (GBC) - საქართველოს ეროვნული ბანკი 2017 წლის 3 იანვრიდან ლარის ოფიციალური გაცვლითი კურსის გაანგარიშებაში  მიკროსაფინანსო ორგანიზაციების გარიგებებსაც გაითვალისწინებს.

მიზეზი ბოლო პერიოდში, მიკროსაფინანსო ორგანიზაციების მიერ Bloomberg-ის სავაჭრო სისტემაში გაზრდილი აქტიურობაა.

სებ-ის ცნობით,  დღეისათვის, Bloomberg-ით  ოთხი მიკროსაფინანსო ორგანიზაცია ვაჭრობს და მომავალში, სავარაუდოდ, მათი რიცხვი კიდევ უფრო გაიზრდება. 

ამავდროულად, ეროვნული ბანკი, თავის ვებგვერდზე ოფიციალური კურსების განთავსებას 4 ძირითადი ვალუტით იწყებს. მთავარ გვერდზე  დოლარისა  და ევროს კურსებს, თურქული ლირა და ფუნტი სტერლინგი დაემატება.

შეგახსენებთ, რომ ლარის ოფიციალური გაცვლითი კურსი წარმოადგენს წინა სავაჭრო დღეს, სავალუტო ბაზარზე, Bloomberg- ის სავაჭრო სისტემაში დადებული გარიგებების საშუალო შეწონილ კურსს, რომელიც გამოიყენება საბუღალტრო აღრიცხვისათვის და ბიუჯეტთან ანგარიშსწორებისათვის.