თბილისი (GBC) – „ბიზნეს სახლის“ მშენებლობა 2017 წლიდან დაწყება, - განაცხადა პრემიერმ-მინისტრმა 2016 წლის შეჯამებისას.

გიორგი კვირიკაშვილი მიიჩნევს, რომ მმართველობითი რეფორმა სხვა ანალოგიურ პლატფორმასთან ერთად, ხელს შეუწყობს საზოგადოების მონაწილეობას მმართველობისა და გადაწყვეტილებების მიღების პროცესში და, შესაბამისად, ხალხს ექნება უფრო მეტი შესაძლებლობა აკონტროლოს ხელისუფლება და ის გადაწყვეტილებები, რომლებიც იქნება მიღებული მმართველობის პროცესში.

 „ყველა შესაბამისი სახელმწიფო უწყება ბიზნესს მოემსახურება ერთი ფანჯრის პრინციპით. ამასთან ერთად, დაიხვეწება და გაუმჯობესდება ონლაინმომსახურება, დაემატება ახალი დისტანციური სერვისები და მოხდება სახელმწიფო სერვისების საფასურის ოპტიმიზაცია“, - განაცხადა პრემიერმა.

შეგახსენებთ, პროექტს საფუძველი სექტემბერში ჩაეყარა. იდეის მიხედვით 600-ზე მეტ სახელმწიფო სერვისს ბიზნესი ერთ შენობაში მიიღებს.

ახალი კონცეფციის სივრცე, რაც ბიზნესისთვის სხვადასხვა უწყებებში გაფანტული სერვისების ერთად   და ერთიან ელექტრონულ პლატფორმაზე მიწოდებას ითვალისწინებს, თბილისში, დიმიტრი გულიას ქუჩაზე, N 3 -ში განთავსდება.

„ბიზნეს სახლი“ განთავსდება 16 000 მ2 შენობაში, სადაც 250-მდე კვალიფიციური თანამშრომელი დასაქმდება.  

რაც შეეხება შენობას, ეს არის თანამედროვე, ინოვაციური, ენერგოეფექტური შენობა,  ექნება მწვანე სახურავი, იქნება მზის ენერგიით უზრუნველყოფილი.

შენობის დიზაინი საშუალებას იძლევა, რომ მის ტერიტორიაზე შეზღუდული შესაძლებლობების მქონე პირებმა - ვიზიტორებმა თუ თანამშრომელებმა თავისუფლად, ყოველგვარი სირთულის გარეშე შეძლონ გადაადგილება.