თბილისი (GBC) - საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ  “ენერგო პრო ჯორჯიას” საკუთრებაში არსებულ ჰიდროელექტროსადგურებზე, 10-დან 9-ზე წარმოების ტარიფი შეამცირა.

ტარიფი გაიზარდა მხოლოდ “აწჰესის” შემთხვევაში, სადაც სემეკმა დიდი მოცულობით განხორციელებული ინვესტიციები გაითვალისწინა.

კერძოდ, 2016 წელს კომპანიმ აღნიშნულ ჰესში 9.58 მილიონი ლარის ინვესტიცია განახორციელა.  მისი წარმოების ტარიფი კი 1.798 თეთრით 5.865-მდე გაიზარდა.

ტარიფები შემცირდა  რიონჰესის, საცხენჰესის, ჩითახევის, ძევრულჰესის, გუმათჰესების კასკადის, ლაჯანურჰესის, შაორჰესის, ორთაჭალაჰესის და ზაჰესის შემთხვევაში.

“ენერგოპრო ჯორჯიას” გენერალური დირექტორის, მიხეილ ბოცვაძის განცხადებით, იაფი ენერგია კიდევ უფრო გაიაფდა და სწორედ ეს თუ გადაარჩენს სამომხმარებლო ტარიფს გაძვირებისგან.

მისივე ინფორმაციით, ჰიდროელექტროსადგურების წილი, ენერგო პროს მოხმარებაში 40%-ს შეადგენს.

სემეკის კომისიის წევრის, გოჩა შონიას განცხადებით, გადაწყვეტილების მიღებისას წინა 5 წლის ფაქტობრივი გამომუშავებები  გაანალიზდა და სწორედ ეს მონაცემები იქნა გათვალიდწინებული.

შეგახსენებთ, რომ “ენერგო პროს” საკუთრებაში არსებულ “ჯიფაუერს” ტარიფი უკვე გაეზარდა.

სამომხმარებლო ტარიფებს 2017 წლისთვის კი, სემეკი ორშაბათს განიხილავს.