თბილისი (GBC) – Fitch -ის მიერ რეიტინგის დადასტურებით  “ჯორჯიან უოთერ ენდ პაუერი”  (GWP) ინვესტორებში ნდობის ზრდას ელის.

გავლენიანი სააგენტოს მიერ ზედიზედ მეორე წელს “BB-“ დონეზე დადასტურებული რეიტინგის მნიშვნელობასა და 2017 წლის საივესტიციო გეგმებზე, კომპანიის მენეჯმენტმა პრესკონფერენციაზე ისაუბრა.

GWP -ის გენერალური დირექტორი გიორგი ცხადაძე აღნიშნავს, რომ რეიტინგის მინიჭება ადასტურებს, რომ კომპანიის მართვის სისტემები არის საიმედო და განვითარება სწორ გზაზეა.

„ ეს საშუალებას  გვაძლევს მოვიზიდოთ დამატებითი ინვესტიციები ჩვენი სტაბილური განვითარებისთვის“, - აღნიშნა ცხადაძემ.

კომპანია 2017 წელს საინვესტიციო პორტფელის გაორმაგებაზე აცხადებს. სხვადასხვა პროექტებში 148 მილიონი დაიხარჯება, მათ შორის, პორტფელის ნახევარი ქსელის რეაბილიტაცია -განვითარებას მოხმარდება.

დაგეგმილია აბონენტების გამრიცხველიანების პროექტის გაგრძელება და ახალი აბონენტების დამატება.

კომპანია 2017 წელს ახალი ჰიდროელექტროსადგურის - ბოდორნაჰესის მშენებლობას და გარდაბნის გამწმენდი ნაგებობის რეაბილიტაციასაც გეგმავს.

საერთაშორისო სარეიტინგო სააგენტო Fitch Ratings-მა კომპანია „ჯორჯიან უოთერ ენდ ფაუერს“, რეიტინგი „BB-“ ყველა კატეგორიაში, ზედიზედ მეორედ მიანიჭა.

„ჯორჯიან უოთერ ენდ ფაუერი“ საქართველოში პირველი და ამ ეტაპზე ერთადერთი არასაფინანსო კერძო კომპანიაა, რომელსაც Fitch Ratings-მა ქვეყნის უმაღლესი სუვერენული  რეიტინგი  „BB-“ ჯერ კიდევ 2015 წელს, პირველივე ცდაზე, მიანიჭა.