თბილისი (GBC) – თბილისი - რუსთავის ავტომაგისტრალის მეორე მონაკვეთის მშენებლობას აზერბაიჯანულ-თურქული ერთობლივი კომპანიის ნაცვლად თურქული Seza Inshaat San veTicaret Limited Sirketi განახორციელებს.

მუნიციპალური განვითარების ფონდის მიერ ოქტომბერში დასახელებული გამარჯვებული Mehmet GuneshInshaatYat and Korpu-Bina- Tikinti, რომელიც სამუშაოების შესრულებისთვის 116,3 მილიონს ითხოვდა, ტენდერიდან დისკვალიფიცირდა -  კომპანიამ მოთხოვნილი საბანკო გარანტია არ წარადგინა.

თბილისის - რუსთავის ავტობანის  ყველაზე რთული მონაკვეთის მშენებლობას თურქული Seza შეასრულებს, თუმცა უფრო ძვირად, კონტრაქტის ღირებულება თითქმის 119 მლნ ლარია.

დაფინანსებას აზიის განვითარების ბანკი (ADB) გამოყოფს.  პროექტის ფარგლებში მოხდება   6.8 კილომეტრიანი 4-6 ზოლიანი ავტომაგისტრალის რეაბილიტაცია,  2 სატრანსპორტო კვანძის, 2 სახიდე გადასასვლელის, საგზაო გვირაბების და მზიდი კედლის მოწყობას.

კონტრაქტის განხორციელების დაგეგმილი პერიოდი 730 დღეა.

შეგახსენებთ, ავტომაგისტრალის სიგრძე ჯამში 17,4 კილომეტრია. პირველი და მესამე მონაკვეთების მშენებლობა უკვე დასრულებულია, რისთვისაც 88,7 მლნ ლარი დაიხარჯა.