თბილისი (GBC) - კომპანია LetterOne-მა  რომელიც მართავს "ალფა ჯგუფის" დამფუძნებლების მიხეილ ფრიდმანის, გერმან ხანის და ალექსეი კუზმიჩევის აქტივებს, არ გამოიყენა უფლება გაეზარდა წილი თურქეთის უმსხვილეს საკომუნიკაციო ოპერატორ Turkcell-ში, - იტყობინება Bloomberg-ი წყაროზე დაყრდნობით. 

გამოცემა აღნიშნავს, რომ Turkcell-ში Cukurova Holding -ის კუთვნილი 13,8% -იანი წილის გამოსყიდვის უფლებას ვადა 28 ნოემბერს ამოიწურა. 

შეგახსენებთ, ლონდონის საარბიტრაჟო სასამართლოს გადაწყვეტილებით  Curukova-ს ჰქონდა უფლება 2,7 მილიარდ აშშ დოლარად გამოესყიდა  LetterOne-ის წილი Turkcell-ში, ან 28 ნოემბრამდე 2,8 მილიარდად მიეყიდა თავისი 13,8%. ამასთან, L1 -მა ადრე ცალსახად განაცხადა, რომ თურქულ ოპერატორში წილის გაზრდით იყო დაინტერესებული. 

Turkcell-ი უმსხვილესი მობილური ოპერატორია თურქეთში, ასევე ფლობს აქტივებს უკრაინაში, ჩრდილოეთ კვიპროსსა და ბელარუსში,  ამასთან Teliasonera-სთან ერთად არის Fintur-ის მეწილეც, რომელიც თავის მხრივ არაერთი მობილური ოპერატორის სტრუქტურაშია წარმოდგენილი, მათ შორის ფლობს "ჯეოსელს".

აღსანიშნავია, რომ ნიუ-იორკის ბირჟის მონაცემებით, Turkcell-ის კაპიტალიზაცია 6,96 მილიარდი  აშშ დოლარია.