თბილისი (GBC) -  კომპანია "ნევადა" განახლებულ დავით აღმაშენებლის გამზირზე, "საქართველოს ფოსტის" ყოფილ შენობაში სასტუმროს გახსნის. 

კომპანიამ აუქციონზე უძრავი ქონება 5,75 მლნ ლარად შეიძინა. აუქციონზე 1 ლარად გამოტანილი ქონების ყიდვაზე ნამდვილი ბრძოლა გაიმართა და რეკორდული ოდენობის  - 575 "ბიჯი" გაკეთდა.

შენობა  კულტურული მემკვიდრეობის ძეგლია. მის ფასადს სარესტავრაციო, სარეაბილიტაციო სამუშაოები  თბილისის განვითარების ფონდის ეგიდით ჩაუტარდა.

საინვესტიციო პირობების მიხედვით, მყიდველი ვალდებულია უზრუნველყოს მინიმუმ 5 300 000 ლარის ინვესტიციის განხორციელება.

აღნიშნულ უძრავ ქონებაზე, სულ მცირე 30 ნომრიანი სასტუმრო და „საქართველოს ფოსტის“ ექსპონატებისთვის განკუთვნილი საგამოფენო დარბაზი მოეწყობა, ასევე, განთავსდება საქართველოს ტურიზმის ეროვნული ადმინისტრაციის წარმომადგენლობა.