თბილისი (GBC) –  რომან გოცირიძე  მინისტრთა კაბინეტის გადაწყობაზე რეკომენდაციას პარლამენტში შესვლამდე  იძლევა.

ნაციონალური მოძრაობის სიის  მე-4  ნომერი  ოპტიმიზაციაზე  მთავრობის დაანონსებულ გეგმას ეხმაურება.

„ხელისუფლება მთავრობის ოპტიმიზაციას აპირებს. თუ სერიოზულად უნდათ ბიუროკრატიული სისტემის რეფორმირება, სასწრაფოდ უნდა გააუქმონ 3 სამინისტრო, რომლებსაც არ გააჩნია ფუნქცია და მხოლოდ მასში შემავალი უწყებების ფორმალურ ზემდგომებად გვევლინება“,-  გოცირიძე  გასაუქმებელ  ინფრასტრუქტურის, ენერგეტიკის და ეკონომიკის სამინისტროებს ასახელებს.

„ესენი უსაქმო სათაო ოფისები არიან. საქმე რეალურად კეთდება ქვედა, მათ დაქვემდებარებაში მყოფ უწყებებში, თუმცა, იქაც საჭიროა სერიოზული ცვლილებების გატარება. ის, რასაც მთავრობა აპირებს, ორი არაეკონომიკური პროფილის სამინისტროს შერწყმას, არის რეფორმირების იმიტაცია. შემდეგი ნაბიჯი უნდა იყოს მთელი ადმინისტრაციული სისტემის დებიუროკრატიზაცია“ - განაცხადა რომან გოცირიძემ.