თბილისი (GBC) – კომპანია „ლეგომეტალი“ სპილენძისა და ლატუნის გადამამუშავებელი საწარმოს შექმნას გეგმავს.

 „აწარმოე საქართველოში“ პროგრამით დაარსებული საწარმო ამჟამად ჯართის გადამუშავებას ახდენს და ალუმინის ნახევარფაბრიკატებს (ალუმინის ზოდები ან დე-ოქსიდანტი) აწარმოებს, რომელიც სრულად ექსპორტზე გადის.

ძირითად სამიზნე ბაზრებს წარმოადგენს ევროკავშირის ქვეყნები და იაპონია. კომპანია  საკუთარი ნაწარმით მსოფლიოს ცნობილ ბრენდს, ავტომობილების მწარმოებელ  “ტოიოტა“ ამარაგებს.

საწარმო პირველმა ვიცე-პრემიერმა დაათვალიერა და მენეჯმენტისგან განვითარების გეგმები მოისმინა.

 „ერთი წლის წინ ამ ადგილას იყო მდელო, ახლა კი 2000 კვ.მ.-ზე მდებარეობს უახლესი ტექნოლოგიებით აღჭურვილი საწარმო, რომელიც ქმნის დამატებულ ღირებულებას და ადამიანებს ასაქმებს,“ - განაცხადა დიმიტრი ქუმსიშვილმა.

მისი თქმით, საწარმოს გეგმებშია ახალი საწარმოო ხაზის გახსნა და არა ნახევარფაბრიკატის, არამედ საბოლოო პროდუქციის გამოშვება.

კომპანია „ლეგომეტალმა“ საწარმოს ასამოქმედებლად 1,480 მლნ აშშ დოლარის  ინვესტიცია ჩადო.