თბილისი (GBC) – ჩქაროსნულ ავტომაგისტრალზე ხევიდან - არგვეთამდე გზის მშენებლობისთვის მთავრობა დონორებთან მოლაპარაკებებს იწყებს.

გზის აღნიშნული მონაკვეთი 3 ნაწილად არის დაყოფილი და თითოეული მონაკვეთის მშენებლობისთვის საჭირო ფინანსები 3 სხვადასხვა დონორისგან იქნება მოზიდული.

უფრო კონკრეტულად, ხევი-უბისას მონაკვეთის დაფინანსებაზე მოლაპარაკებები აზიის განვითარების ბანკსა და კორეის ექსიმბანკთან გაიმართება.

უბისა-შორაპნის სექციაზე ევროპის საინვესტიციო ბანკთან, ხოლო შორაპანი-არგვეთას გზის დასაფინანსებლად იაპონიის საერთაშორისო თანამშრომლობის სააგენტოსთან.

შეგახსენებთ, რიკოთის უღელტეხილზე,  52 კილომეტრზე ავტობანის მშენებლობისთვის პროექტირებაც იწყება.

საავტომობილო გზების დეპარტამენტის ხელმძღვანელის თქმით,  4 ზოლიანი გზის პროექტირებისთვის მომდევნო 1 წლის განმავლობაში, 40 მილიონი აშშ დოლარი დაიხარჯება. ალტერნატიულ მარშრუტად ხარაგაულის შემოვლითი გზა განიხილება.

მისი თქმით, ამჟამად უკვე აშენებულია 150 კილომეტრი ჩქაროსნული ავტობანი და კიდევ 100 კილომეტრის მშენებლობა მოხდება.