თბილისი (GBC) - თბილისში, უმაღლესი კლასის სასტუმროს "ბილთმორის" გახსნისთვის ბოლო სამზადისი მიმდინარეობს. 

ორგანიზატორთა ცნობით, 31 ივლისს, 21:30 საათზე, სასტუმროს გახსნას გრანდიოზული კონცერტი, 3D და  ლაზერ -შოუ მიეძღვნება. სპეციალურად ამ დღისთვის ქვეყანაში სტუმრებსაც  ელიან.  

უკვე მიმდინარეობს შენობის საგანგებო თეთრი სტიკერით დაფარვა, რათა  სამხრეთ კავკასიაში უპრეცედენტო ლაზერ შოუ და 3D შოუ გაიმართოს. 

კომპლექსი, რომელიც ე.წ იმელის შენობას და მის უკან 130 მეტრიან კოშკს აერთიანებს, არაბულ "დაბი ჯგუფს" ეკუთვნის. მის მშენებლობაში 140 მლნ აშშ დოლარის ინვესტიცია ჩაიდო. 

იმელის შენობაში სასტუმრო ფუნქციონირებას მისი გასხვისებიდან 10 წლის შემდეგ იწყებს. 

შეგახსენებთ,  არაბულმა „დაბი ჯგუფმა" ობიექტის („იმელის" შენობა და მიმდებარე ტერიტორია) 80%-იანი წილი "კაპიტალ ვოსტოკისგან" 22 მლნ აშშ დოლარად 2008 წლის მარტში იყიდა. თავის მხრივ კი,  "კაპიტალ ვოსტოკმა" ეს  შენობა 2006 წელს, 15 მლნ აშშ დოლარად შეიძინა.