თბილისი (GBC) - SOCAR-ი ქართული სპორტის სასპონსორო დაფინანსების გაზრდას გეგმავს. 

აღნიშნულს კომპანიასა და  სპორტისა და ახალგაზრდობის საქმეთა სამინისტროს შორის თანამშრომლობის მემორანდუმი ითვალისწინებს, რომელიც 8 ივნისს, 13:00 საათზე გაფორმდება.  

ხელშეკრულებას ხელს მოაწერენ მინისტრი ტარიელ ხეჩიკაშვილი და აზერბაიჯანის რესპუბლიკის სახელმწიფო ნავთობკომპანიის პრეზიდენტი როვნაგ აბდულლაევი. 

სამინისტროს ცნობით, კომპანიას გააჩნია, მრავალწლიანი, ურთიერთმომგებიანი, წარმატებული სპონსორული საქმიანობა საქართველოს სპორტულ ორგანიზაციებთან (ოლიმპიური კომიტეტი, ფეხბურთის ფედერაცია, ჭადრაკის ფედერაცია და სხვა), და დღემდე აგრძელებს ამ საქმიანობას.

სამინისტრო იწვევს SOCAR-ს, რათა გააგრძელოს საქართველოში სპორტის მხარდაჭერისა და განვითარების ხელშეწყობისაკენ მიმართული  სპონსორული საქმიანობა მომავალშიც.

მემორანდუმის ხელმოწერიდან ერთი წლის განმავლობაში SOCAR-ი, დამატებით მოიზიდავს თანხებს და მიმართავს აღნიშნულ ფინანსურ რესურსს სპონსორული საქმიანობისათვის, რომელიც მოიცავს საქართველოში სპორტული პროექტებისა და ღონისძიებების ხელშეწყობას და მხარდაჭერას.