თბილისი (GBC) – “საქართველოს რკინიგზა“ საქართველოს ბაზარზე პირველად ორსართულიან მატარებლებს წარადგენს.

ევროპული სტანდარტის,  შვეიცარული STADLER- ის მატარებლები სამგზავრო დანიშნულებისაა. მატარებლები სარკინიგზო მაგისტრალებზე მოძრაობას ზაფხულიდან დაიწყებენ.

პირველ  ეტაპზე კომპანია 2 მატარებელს მიიღებს, კიდევ ორს კი 2017 წლის დასაწყისში. 1 მატარებლის შეძენა „საქართველოს რკინიგზას“ 9,950 მლნ ევრო დაუჯდა.

კომპანიის ცნობით, ოთხი ახალი მატარებელი საჭირო ყველა თანამედროვე მოწყობილობით, ულტრათანამედროვე ტიპის უსაფრთხოების სისტემებით არის აღჭურვილი, რომელიც სრულ შესაბამისობაშია ევროპულ უსაფრთხოების სტანდარტებთან.

„ქართულ რეალობაში ეს იქნება პირველი მატარებელი, რომელიც სრულად იქნება მორგებული შეზღუდული შესაძლებლობების მქონე პირების საჭიროებებზე”, - აცხადებს კომპანია.