თბილისი (GBC) –  "ბილაინის" (შპს მობიტელი) მიერ Caucasus Online-ის აქტივის შესყიდვაზე გადაწყვეტილების მიღებას კომუნიკაციების კომისია  ვეღარ გადაავადებს.

კანონით, მარეგულირებელმა მხარეებისგან  ყველა საჭირო დოკუმენტის გამოთხოვა  და შესწავლა  3 კვირაში უნდა დაასრულოს. გარიგების მონაწილეები აღნიშნავენ, რომ ბოლო ვადა 5 აპრილია და ამის გათვალისწინებით, 25 მარტისთვის დანიშნულ სხდომაზე  საკითხი გადაწყდება.

მორიგი სხდომის  აღნიშნული თარიღი, 10 მარტის განხილვაზე ჩაინიშნა, იმ საფუძვლით, რომ დოკუმენტაცია იყო ვრცელი და  მარეგულირებელს სამუშაო დღეები დეტალურად შესწავლისთვის არ ეყო.

გარიგების მონაწილეების ცნობით,  კომისია  დამატებით დოკუმენტაციას ითხოვს,  რაც ერთმნიშვნელოვნად  განსაზღვრავს მყიდველის ვალდებულებას, რომ  შპს „მობიტელის“  (ბილაინი) კაპიტალში მთავარი აქციონერის  შეტანილი თანხიდან Caucasus Online-ის  $75 მილიონის  დავალიანება, მთლიანად   დაუყოვნებლივ გასტუმრდება და არა 1-წლიანი, 5-წლიანი  თუ სხვა ვადიანობის გრაფიკით. მთავარი კრედიტორი თიბისი ბანკია. 

მხარეების განცხადებით,  საჯარო მაღალი ინტერესის გათვალისწინებით,  მარეგულირებელი უნდა დარწმუნდეს, რომ  გარიგების მიზანი კომპანიის განვითარებაა, რაზეც მყიდველი საინვესტიციო ვალდებულებებსაც იღებს.  შესაბამისად, კომისია ითხოვს კაპიტალის ინექციაში  ხარჯები გაიმიჯნოს, რომ „ბილიანის“ ამბიციებთან ინვესტიციის შესაბამისობა და ხარჯებზე ორიენტირება განისაზღვროს.

„ბილაინის“ გეგმებს შორის Caucasus Onlines-ის პირდაპირი დაშვების გეოგრაფიული არეალის გაფართოებაა. ამ დროისთვის  მხოლოდ 4 ქალაქშია წარმოდგენილი.

ამის გათვალისწინებით, ბაზრის მოთამაშეები არც კონტრაქტის გაძვირებას გამორიცხავენ.