თბილისი (GBC) - Royal Bank of Scotland-ი (RBS) კლიენტებს აქტივების გაყიდვისკენ მოუწოდებს.

ბანკმა ახალ ანალიტიკურ ანგარიშში დაწერა, 2016 წელს ფინანსურ ბაზრებზე „კატაკლიზმებს“ ელის.

RBS-ის საკრედიტო განყოფილების ხელმძღვანელმა ენდრიუ რობერტსმა ინვესტორებს მოუწოდა ყველაფერი გაყიდონ, გარდა ძალიან მაღალლიკვიდური აქტივებისა.

ბანკი მიიჩნევს, რომ ინვესტორებისთვის  რისკები ძალიან მაღალია, რადგანაც „ხალხმრავალი დარბაზის გასასვლელი ყოველთვის ძალიან ვიწროა“.

ამასთან, RBS-ი  მიიჩნევს, რომ ინვესტორებმა  წელს არა მოგების მიღებაზე, არამედ კაპიტალის შენარჩუნებაზე უნდა იზრუნონ.

ენდრიუ რობერტსის პროგნოზით, რომ ევროპული და ამერიკული ბაზრები წელს შესაძლოა 10-20%-ით შემცირდეს. ნეგატიური შოკის მიმართ ასევე ძალიან დაუცველია ლონდონის ფინანსური ბაზარიც.

„ყველა ვინც ყიდულობს ნავთობისა და გაზის აქტივებს და ფიქრობს, რომ მათი დივიდენდები უსაფრთხოა, მიხვდებიან, რომ ეს სულაც არ არის ასე“, - ციტირებს  The Guardian-ი რობერტს.

ნეგატიურ ფაქტორებად Royal Bank of Scotland-ი ასახელებს: ნავთობის გაუფასურებას, ჩინეთის ბაზარზე არასტაბილურობას, მსოფლიო ვაჭრობის შემცირებას, ვალის ზრდას, სუსტ კორპორაციულ დაკრედიტებას და დეფლაციას.

"ვფიქრობთ, ინვესტორები უნდა გაფრთხილდნენ", - ასკვნის რობერტსი.

აღსანიშნავია, რომ Royal Bank of Scotland-მა 2015 წლის დეკემბერში ნავთობის 16 აშშ დოლარამდე გაუფასურებაც  ივარაუდა.