თბილისი (GBC) -  “გაზპრომის” მიერ შემოთავაზებული ფასი SOCAR-ის ფასზე ნაკლებია, - აცხადებს ენერგეტიკის მინისტრი კახა კალაძე, რომელიც გაზის ფასთან დაკავშირებულ საკითხის განხილვას ოთხშაბათს SOCAR Energy Georgia -ს პრეზიდენტთან, მაჰირ მამედოვთან გეგმავს, რომელიც უკვე საქართველოშია.  

"სოკარს ინფორმაცია მივაწოდეთ და ხვალინდელ შეხვედრაზე დეტალებს გავივლით. აზერბაიჯანულ მხარეს ჩვენთან პრეტენზიები არ დაუფიქსირებია. ეს თემა მედიამ ააგორა და კომენტირებისგან თავს შევიკავებ", - განაცხადა კახა კალაძემ ტელეკომპანია GDS-ის ეთერში.

SOCAR Energy Georgia -ს ხელმძღვანელმა მაჰირ მამედოვმა კი, ოფიციალურ მოლაპარაკებამდე რამდენიმე მედია საშუალებას ინტერვიუ მისცა.

ის რომ საქართველოს გაზმომარაგებაში არასოდეს სერიოზული პრობლემა არ შექმნილა, მამედოვმა აზერბაიჯანულ სააგეტნო Trend-ს განუცხადა. მისი თქმით, პერიოდულად ხდება სხვადასხვა პროცესები, თუმცა ეს არ აისახება გაზის მოწოდების საერთო მოცულობაზე.

„საქართველოს ბუნებრივი აირის ჯამურ მოცულობაში გათვალისწინებულია ის გაზიც, რომელსაც საქართველო რუსეთისგან ტრანზიტისთვის იღებს, ეს არის მთლიანი კალათის 10-15% და იმ შემთხვევაში თუ არის რაიმე სახის ტექნიკური პრობლემა, ან სამუშაო პროცესი რუსულ თუ აზერბაიჯანულ მხარეს, მაშინ ხდება მოწოდებაში გარკვეული კორექტირება. მხარეები უკვე 7 წელია ამ რეჟიმში ვმუშაობთ და მიწოდებაში პრობლემა არ წარმოქმნილა“, - განაცხადა მამედოვმა.

ის აღნიშნავს, რომ საქართველო ბუნებრივ გაზს სამი გაზსადენით იღებს: ერთი- ეს არის გაჯიგაბულ-გარდაბანის გაზსადენი, რომლის სიმძლავრეა 6,5 მლნ კუბ. მეტრი, მეორე ბაქო-თბილისი-ერზრუმი, დღე/ღამეში მოწოდების მოცულობა 3 მლნ კუბ.მეტრია, მესამე გაზსადენია რუსეთიდან შემომავალი. 

მამედოვმა ტელეკოპანია "მაესტროს" კი განუცხადა, რომ "ჯერ არ ყოფილა არავითარი მიზეზი ისეთი პროგნოზისთვის, რომ ჩვენ საქართველოსთვის გაზის საკმარისი ოდენობის მიწოდებას ვერ შევძლებთ. ასე რომ საქართველოს ბუნებრივი აირი გეგმის მიხედვით მიეწოდება".