თბილისი (GBC)  -  თბილისში, პუშკინის ქუჩაზე ესტაკადას „კავკასუს როუდ პროჯექტი“ ააშენებს.

კომპანიამ თბილისის მერიის მიერ გამოცხადებულ ტენდერში გაიმარჯვა და  3 949 999 ლარის ღირებულების კონტრაქტი მოიპოვა.

ეტაკადის მშენებლობისთვის 4,752 მლნ ლარი იყო  გამოყოფილი. ტენდერში 4 კომპანია მონაწილეობდა, ყველაზე დაბალი ფასი  - 3,8 მლნ ლარი „სამშენებლო-სამონტაჟო სამმართველო სევერო-ზაპადის წარმომადგენლობა საქართველოში“ -მ  დაასახელა, თუმცა კომპანია ტენდერიდან დისკვალიფიცირდა. შესაბამისად, გამარჯვებული „კავკასუს როუდ პროჯექტი“ გახდა, რომლის 100% -იანი წილი დასაქმების ექს-მინისტრს, პაატა ტრაპაიძეს ეკუთვნის.

ხელახალი რეკონსტრუქციის შემდეგ, ქუჩაზე ავტოტრანსპორტის მოძრაობა ორმხრივად განხორციელდება.

პროექტით, ესტაკადის ქვეშ ხელუხლებელი დარჩება წინა რეკონსტრუქციისას აღმოჩენილი ისტორიული მემკვიდრეობის ძეგლები. ტურისტებს და ქალაქის მაცხოვრებლებს მათი დათვალიერება შეეძლებათ როგორც ზემოდა, ისე ჩასასვლელი კიბეების გამოყენებით.

პროექტის კონცეფცია ითვალისწინებს ესტაკადის ქვეშ ფეხით მოსიარულეთათვის თავისუფალი გადასასვლელის მოწყობას, ესტაკადის მალის ნაშენის მზიდი კონსტრუქციების განლაგების გათვალისწინებით.

გამარჯვებულმა კომპანიამ  სამუშაო უნდა დაიწყოს ხელშეკრულების გაფორმებიდან 5 დღეში. დასრულება კი ხელშეკრულების გაფორმებიდან 210 დღეშია გათვალისწინებული.