თბილისი (GBC) -BitFury Group -ი ტექნოლოგიური პარკის თავისუფალი ინდუსტრიული ზონის, I მოიჯარის, “BitFury Group მეგა დატა ცენტრის” გახსნაზე აცხადებს.

პრეზენტაცია  ოთხშაბათს, 10:45 სთ-ზე BitFury Group მეგა დატა ცენტრში გაიმართება (გლდანი, ელექტრო ქვესადგურის "გლდანი 220" მიმდებარედ).

ღონისძიებაში მონაწილეობენ  ქვეყნის პრემიერი ირაკლი ღარიბაშვილი,  ეკონომიკის მინისტრი  დიმიტრი ქუმსიშვილი BitFury Group დამფუძნებელი ვალერი ვავილოვი, და  “ჯორჯია თექნოლოჯი პარკის“ გენერალური დირექტორი გიორგი ტაბიძე.  

შეგახსენებთ, თბილისის ტექნოლოგიურ პარკში თავისუფალმა ინდუსტრიულმა ზონამ ფუნქციონირება 2015 წლის 30 ნოემბრიდან დაიწყო და 49 წლის ვადით იმუშავებს. 

აღსანიშნავია, რომ Bitfury-იმ საქართველოში მორიგ ინვესტიციაზე ამ წლის ზაფხულში განაცხადა. მაშინ აღინიშნა, რომ თბილისში, გლდანში, ყოფილი „ტარზის" ტერიტორიაზე აშენებულ ტექნოპარკში BitFury განათავსებს მეგა დატა ცენტრს, რომლის სიმძლავრე 100 მგვტ-ს გაუტოლდება, ხოლო ტრანზაქციების პროცესინგი განხორციელდება BitFury-ის ბოლო თაობის 28 -ნანომეტრიანი და 16- ნანომეტრიანი სპეციალური დიზაინისა და მახასიათებლების ASIC ტიპის ჩიპების მეშვეობით.

ამასთან, ინვესტორმა ვალდებულება აიღო  რომ  8 თვეში ადგილზე მონაცემთა დამუშავების ცენტრს შექმნიდა  და  არანაკლებ 11,110 მლნ აშშ დოლარის ინვესტიციას განახორციელებდა.