თბილისი (GBC)- კომპანია „ჯანმრთელი პროდუქტები“ პარტნიორი სუპერმარკეტების რაოდენობას აფართოებს.

„ჯანმრთელი პროდუქტების“ უნიტრატო პომიდორი „გუდვილის“ ქსელშიც გაიყიდება.

„დახლზე გამოტანილი თითოეული პროდუქტი ეტიკეტირებულია, რითაც მომხმარებელი ადვილად ამოიცნობს. პომიდორი უნიტრატოა, ყოველი პარტია ლაბორატორიაში მოწმდება. პომიდორში ნიტრატების ოდენობა მხოლოდ 17 ერთეულია, მაშინ როდესაც დასაშვები ნორმა 300 ერთეულს შეადგენს. პროდუქციის მოყვანა ბიოსტანდარტების შესაბამისი მეთოდოლოგიით ხორციელდება და უკვე დაწყებულია მუშაობა ბიო სერტიფიკატის მისაღებად“, - აცხადებს კომპანიის დირექტორი მამუკა გუნია, ის აღნიშნავს, რომ ეს საპილოტე პროექტია და სამომავლოდ წარმოების გაფართოება და სხვა ბოსტნეულის მოყვანაც იგეგმება.

შეგახსენებთ, „ჯანმრთელი პროდუქტების“ პომიდორი „სმარტის“ ქსელში 28 ნოემბრიდან შევიდა.

კომპანია სასათბურე მეურნეობას თეთრიწყაროს მუნიციპალიტეტში, სოფელ კოდაში ფლობს. 2000 კვ. მეტრის თანამედროვე ტექნოლოგიებით აღჭურვილი სათბურის მშენებლობისთვის 200 000 აშშ დოლარის ინვესტიცია განხორციელდა.

თანხის ნაწილი სესხია, რომელიც კომპანიამ „შეღავათიანი აგროკრედიტის პროექტის“ ფარგლებში, „საქართველოს ბანკისგან“ მოიპოვა.