როგორც სააგენტო GBC-ის LC Waikiki-ს საერთაშორისო საცალო ვაჭრობის მენეჯერმა გიორგი დალალიშვილმა განუცხადა, კომპანია მომავალ წელს გაფართოებისთვის 5 მლნ აშშ დოლარის ინვესტირებას გეგმავს.

უკვე გადაწყვეტილია, რომ 2016 წელს LC Waikiki-ს მაღაზიები გაიხსნება ბათუმში, ზუგდიდში და თბილისში, მეტრო „მარჯანიშვილის" მიმდებარედ. ასევე დაგეგმილია  რუსთავში LC Waikiki-ის Outlet Center-ის გახსნაც.

კომპანიის მენეჯერის განმარტებით, ბათუმში LC Waikiki-ს რიგით მეორე მაღაზია „მეტრო სითის" სავაჭრო ცენტრ „მეტროსითი ფორუმში" გაიხსნება. ბათუმში პირველი სავაჭრო ცენტრის მშენებლობა ჯერ დასრულებული არ არის, თუმცა კომპანიამ 1200 კვ/მ ფართი წინასწარ უკვე დაიქირავა. მაღაზიაში 50 ადამიანის დასაქმება მოხდება.

გიორგი დალალიშვილი ამბობს, რომ 2018 წლამდე LC Waikiki-ს მიზანი საქართველოში მხოლოდ მაღაზიათა ქსელის გაფართოებაა.

სამომავლო გეგმები, მათ შორის, ხომ არ დაიწყებს  LC Waikiki  საქართველოში საკუთარი ბრენდის ტანსაცმლის კერვას, 2018 წლისთვის განისაზღვრება.

ამ დროისათვის LC Waikiki საქართველოში 7 ბრენდული მაღაზიის მფლობელია, რომელთა უმეტესობა თბილისში მდებარეობს.

LC Waikiki-ს ბრენდი 1985 წელს საფრანგეთში შეიქმნა, რომელიც 1997 წელს LC Waikiki Mağazacılık-მა შეიძინა. ქსელი, ემსახურება მილიონობით მომხმარებელს 500-მდე მაღაზიის მეშვეობით, რომლებიც 23 ქვეყანის 141 ქალაქშია განთავსებული.

2015 წლის ბოლოსთვის კომპანია გეგმავს საერთაშორისო მაღაზიების რიცხვის 200-მდე გაზარდოს.