თბილისი (GBC) - ფარმაცევტული პროდუქციის მწარმოებელი კომპანიის „ინოვასი" ნაწარმით უცხოური კომპანიები დაინტერესდნენ.

პროექტ „აწარმოე საქართველოში" ფარგლებში შექმნილმა კომპანიამ, მსოფლიო ფარმაცევტული ინდუსტრიის ყველაზე დიდ გამოფენაში CPHI Worldwide 2015-ში მიიღო მონაწილეობა, რაც მისთვის განსაკუთრებით შედეგიანი აღმოჩნდა.

კომპანიის ცნობით, მათ უკვე აქვთ კონკრეტული შეკვეთები რუსეთიდან, ყაზახეთისა და უკრაინიდან. თანამშრომლობას ასევე განიხილავს დასავლეთ აფრიკის ერთ-ერთი სახელმწიფო -ბენინი.

ამასთან, კომპანიის პოტენციალის გაცნობის შემდეგ, თანამშრომლობის სურვილი გამოთქვა იტალიურმა კომპანიამაც, რომელიც  ერთ-ერთი ფარმაკოლოგიური პროდუქციის აქტიური ინგრედიენტის ექსკლუზიურად კომპანია „ინოვასისგან" შეძენაზე და შესაბამისად, სხვა მომწოდებელი ქვეყნის საქართველოთი ჩანაცვლებაზე ფიქრობს. დეტალებს კომპანია ჯერ არ ასაჯაროებს.

შეგახსენებთ, „ინოვასის"  საერთაშორისო სტანდარტების საწარმოს დასაარსებლად 4 მილიონ აშშ დოლარამდე ინვესტიცია განხორციელდა, ის აღჭურვილია უახლესი ტექნოლოგიის საწარმოო ხაზით.

აღსანიშნავია, რომ , მეწარმეობის განვითარების სააგენტოს ორგანიზებითა და ხელშეწყობით CPHI Worldwide 2015 -ში მონაწილეობა ასევე მიიღეს  PSP-მ და „ავერსმა".

CPHI Worldwide 2015 ერთ-ერთი ყველაზე გავლენიანია ფარმაცევტულ ინდუსტრიაში, იგი აერთიანებს კომპანიებს მთელი მსოფლიოდან და ათასობით ვიზიტორს უყრის თავს, ამჯერად, კი ვიზიტორების რიცხვმა 40 000-ს გადააჭარბა.

აღსანიშნავია, რომ ბოლო პერიოდში საქართველოდან ფარმაცევტული პროდუქციის ექსპორტი ზრდის ტრენდით ხასიათდება.

სამკურნალო საშუალებების ექსპორტმა 9 თვეში  96,5 მლნ გადააჭარბა, შარშან ამავე პერიოდში ექსპორტის მოცულობა 66 მილიონამდე იყო.