თბილისი (GBC) - მიმდინარე წლის პირველი სექტემბრიდან საქართველოში მინიმალური პენსია 100 ლარი იქნება, ხოლო მომავალი წლის პირველ ნახევარში 100 აშშ დოლარს მიაღწევს.

ამის შესახებ პრეზიდენტმა მიხეილ სააკაშვილმა ორშაბათს, რუსთავის ბიბლიოთეკაში პენსიონერებთან შეხვედრისას განაცხადა. მისი თქმით, მუშავდება ახალი საპენსიო რეფორმა, რომლის ფარგლებში ჯანდაცვის სისტემაში თანხების გადაჯგუფებით პენსიები გაიზრდება.

პრეზიდენტის განცხადებით, დღეს თბილისსა და რეგიონებში პენსიები დიფერენცირებულია, რადგან თბილისის მერია ქალაქის პენსიონერებს მინიმალურ პენსიაზე 10 ლარს უმატებს.

„ახალი საპენსიო სისტემით პენსიონერებს იდენტური პენსია ექნებათ. ამას დაემატება 7 ლარი სტაჟისა და დამსახურების მიხედვით, ხოლო სიღარიბის ზღვარს მიღმა მყოფ პენსიონერებს, საშუალოდ 30%-ს - 30 ლარი, ანუ წლის ბოლომდე საქართველოში პენსია მინიმალურ სამომხმარებლო კალათას გადააჭარბებს", - აღნიშნა პრეზიდენტმა.

მისივე თქმით, მთავრობის წევრებმა საპენსიო რეფორმის შემუშავებისას ჩილესა და სინგაპურის გამოცდილება გაიზიარეს.

დღეისათვის რეგიონებში მინიმალური პენსია 80 ლარს შეადგენს, ხოლო თბილისში - 90 ლარს.