"ეროვნული ბანკის შესახებ" კანონპროექტი პარლამენტმა პირველი მოსმენით 11 ივლისს მიიღო. სებ-ის პრეზიდენტის გიორგი ქადაგიძის განმარტებით, ეროვნული ბანკის და საფინანსო ზედამხედველობის სააგენტოს შერწყმა ადგილობრივ და გლობალურ ბაზრებზე არსებულმა ახალმა რეალობებმა განაპირობა. სებ-ის პრეზიდენტს მიაჩნია, რომ გაერთიანებული სტრუქტურა უფრო ეფექტიანად შეძლებს ახალ გამოწვევებთან გამკლავებას. გარდა ამისა, 2 სტრუქტურის გაერთიანებით მოხდება ადმინისტრაციული ხარჯების ეკონომია.

რაც შეეხება სადაზღვევო სფეროს რეგულირების ახალი ნორმების შემოღებას, ქადაგიძის ინფორმაციით, ეს ჯერ კიდევ გასული წლის ზაფხულში იგეგმებოდა, თუმცა აგვისტოს მოვლენების და შემდგომში არსებული უფრო მნიშვნელოვანი პრობლემების მოგვარების აუცილებლობის გამო, პროცესი გაჭიანურდა.

კანონპროექტის ავტორებს მიაჩნიათ, რომ რეგულირების ახალი ნორმები სადაზღვევო ინდუსტრიის საქმიანობას უფრო გამჭირვალეს და მომხმარებელთა ინტერესებზე მორგებულს გახდის.     

საქართველოს ეროვნულ ბანკთან (სებ) საფინანსო ზედამხედველობის სააგენტოს შერწყმის პოზიტივებზე მთავრობის არგუმენტები ყოფილ სახელმწიფო მინისტრს და 2008 წელს აღნიშნული 2 სტრუქტურის გაყოფის ინიციატორს კახა ბენდუქიძეს უსაფუძვლოდ მიაჩნია.