თბილისი (GBC) – საქართველოს უახლეს ისტორიაში ერთ–ერთი ტრაგიკული – სოხუმის დაცემის დღიდან 29 წელი გავიდა. სოხუმის დაცემის დღესთან დაკავშირებით, პარლამენტისა და სახელმწიფო კანცელარიის და ქვეყნის მასშტაბით ყველა ადმინისტრაციულ შენობაზე სახელმწიფო დროშები დაეშვა.

სოხუმის დაცემის დღესთან დაკავშირებით სახელმწიფო დროშები დაშვებულია თავდაცვის სამინისტროსა და თავდაცვის ძალების სამხედრო ბაზებზეც.

1992-1993 წლებში,  ომის  შედეგად, საქართველომ 3 ათასზე მეტი ჯარისკაცი და 10 ათასზე მეტი მშვიდობიანი მოქალაქე დაკარგა, 300 ათასზე მეტი კი დევნილად იქცა.

2008 წლის აგვისტოს ომის შემდეგ კი რუსეთის შეიარაღებულმა ძალებმა აფხაზეთისა და ცხინვალის რეგიონის ოკუპაცია განახორციელა. კრემლის საოკუპაციო ჯარები დღემდე აკონტროლებენ საქართველოს ამ ორ რეგიონს.