თბილისი (GBC) - გარემოს დაცვისა და სოფლის მეურნეობის სამინისტროს განზრახვასთან დაკავშირებით, რომლის თანახმად შესაძლოა, ქვეყანაში ძველი ავტომობილების იმპორტი აიკრძალოს, საავტომობილო ბაზრის უმსხვილესი მოთამაშის, კავკასიის ავტო იმპორტის დირექტორი გიორგი სურგულაძე ამბობს, რომ იდეას გარემოზე ზემოქმედების კუთხით მხარს უჭერს, თუმცა საკითხი არ არის სიღრმისეულად მომზადებული.

სურგულაძემ GBC-სთან საუბარში განაცხადა, რომ ავტოპარკის ,,განახლებას’’ მიესალმება, თუმცა მთავრობის მხრიდან გაჟღერებულ 2013 წლამდე ავტომობილების იმპორტის შეზღუდვას ზედაპირულს და გაუთვლელს უწოდებს.

,,მიუხედავად იმისა, რომ 2013 წლამდე ავტომობილების იმპორტზე მოთხოვნა მინიმალურია, უმეტეს შემთხვევაში ამერიკული 20 წლის ავტომობილი ევროპულ 12 წლის ავტომობილზე გაცილებით ეკოლოგიურია. ამიტომ საკითხზე სიღრმისეული კვლევაა საჭირო’’, - აცხადებს სურგულაძე.

მისივე თქმით, ასეთი გადაწყვეტილება, მისი მიღების შემთხვევაშიც, არსებით გავლენას ვერ მოახდენს კავკასიის ავტო იმპორტის ბრუნვაზე.