თბილისი (GBC) - რუსეთის ფედერაციის ფინანსურმა სექტორმა, უკრაინის წინააღმდეგ კრემლის ფართომასშტაბიანი სამხედრო აგრესიის გამო დაწესებული დასავლური სანქციების შედეგად ასობით მილიარდი დოლარი დაკარგა. ამის შესახებ სააგენტო Bloomberg რუსეთის ფინანსთა სამინისტროს შიდა დოკუმენტებზე დაყრდნობით წერს.

სააგენტოს მონაცემებით, ეს ანგარიში რუსი მაღალჩინოსნების თათბირისთვის მომზადდა, რომელიც 29 აგვისტოს გაიმართა. დოკუმენტის შინაარსი იმ წყაროებმაც დაადასტურეს, რომლებიც ჩართული იყვნენ პროცესებში.

დოკუმენტის თანახმად, სამინისტრომ პირდაპირ დანაკარგებში ჩათვალა: საფონდო ბაზრის კაპიტალიზაციის 40%–იანი ვარდნა; საბანკო კაპიტალის 10%–ით შემცირება; ცენტრალური ბანკის რეზერვების გაყინვა $300 მლრდ–ის მოცულობით; გაყინულ ევრობონდებში არსებული 4,6 ტრილიონი რუბლი; 563 მლრდ რუბლის მოცულობის გაყინული საცალო აქტივები.

ანგარიშში სანქციებისგან მიყენებული ზარალის ჯამური მოცულობა არ სახელდება.

რუსეთის ფინანსთა სამინისტროში ამ საკითხთან დაკავშირებით კომენტარი არ გააკეთეს.