თბილისი (GBC) – კრემლში ჯერჯერობით ვერ ხედავენ რუსეთისა და უკრაინის პრეზიდენტების მოლაპარაკებათა მაგიდასთან დასხდომის წინაპირობებს. ამის შესახებ პუტინის პრეს–მდივანმა დმიტრი პესკოვმა განაცხადა და დასძინა, რომ პუტინს მუდმივად აწვდიან ინფორმაციას უკრაინაში მიმდინარე საბრძოლო მოქმედებების შესახებ.

კვირას, 11 სექტემბერს უკრაინის პრეზიდენტმა ვოლოდიმირ ზელენსკიმ განაცხადა, რომ შეუძლებელია რუსეთთან მოლაპარაკებების წარმოება. მისი თქმით, სამშვიდობო მოლაპარაკებები მხოლოდ მას შემდეგ შეიძლება გაიმართოს, რაც რუსეთი დაკავებულ უკრაინულ ტერიტორიებს გაათავისუფლებს.

Bloomberg-ის ინფორმაციით, ღამით ჩრდილო-აღმოსავლეთ უკრაინაში ელექტროენერგია გაითიშა. მიზეზი უკრაინის ელექტროსადგურებზე რუსეთის მიზანმიმართული სარაკეტო შეტევაა.

გამოცემის ცნობით, უკრაინის ძალების ელვისებურმა დარტყმებმა რუსების საჯარისო ნაწილების უკან დახევა გამოიწვია.

Bloomberg-ის ინფორმაციით, გასულ ღამეს რუსულმა ავიაციამ 30-ზე მეტი დასახლება დაბომბა უკრაინაში.

ამ დროისათვის უკრაინაში დაბომბილია 2 ელექტროსადგური. მათ შორის ერთი ხარკოვშია.