თბილისი (GBC) – ყაზახეთის პრეზიდენტმა ყასიმ ჟომარტ თოყაევმა საზოგადოებას მიმართა ინიციატივებით, რომელთა თანახმად ამნისტია შეეხება იანვრის საპროტესტო აქციების დროს დაპატიმრებულ მოქალაქეებს და დაინიშნება ვადამდელი საპრეზიდენტო არჩევნები 2022 წლის შემოდგომაზე. ამის შესახებ ინფორმაციას პრეზიდენტის ადმინისტრაციის პრეს–ცენტრი ავრცელებს.

„გთავაზობთ ამ შემოდგომაზე რიგგარეშე საპრეზიდენტო არჩევნების ჩატარებას“, – განაცხადა თოყაევმა.

მისი თქმით, ყოვლისმომცველი რეფორმებისა და სამართლიანი ყაზახეთის მშენებლობისთვის მოსახლეობის მხრიდან ნდობის ახალი მანდატია საჭირო.

რაც შეეხება ამნისტიას, თოყაევის თქმით, ეს არ შეეხება მხოლოდ იმ ადამიანებს, ვინც ორგანიზებას უწევდა არეულობას და ასევე ბრალად ედებათ სახელმწიფო ღალატი.