თბილისი (GBC) - 2021 წელს საქართველოში ფუნქციონირებდა სასტუმროს მომსახურებით დაკავებული 1 726 ეკონომიკური სუბიექტი, რომლებიც ფლობდნენ 1 776 სასტუმროსა და სასტუმროს ტიპის დაწესებულებას (ადგილობრივი ერთეულებისა და ფილიალების ჩათვლით). საქსტატის მონაცემების თანახმად, აღნიშნული მაჩვენებელი 68.5%-ით გაიზარდა 2020 წელთან შედარებით.

საქსტატის ცნობით, სასტუმროს მომსახურებით დაკავებული ეკონომიკური სუბიექტებისათვის ყველაზე გავრცელებულ ორგანიზაციულ-სამართლებრივ ფორმას წარმოადგენდა „ინდივიდულური მეწარმე“, რომელიც შეადგენდა 2021 წელს მოქმედი სასტუმროებისა და სასტუმროს ტიპის დაწესებულებების საერთო რაოდენობის 53.3%-ს.

ქვემოთ მოცემული დიაგრამა ასახავს სასტუმროებისა და სასტუმროს ტიპის დაწესებულებების რაოდენობის განაწილებას ორგანიზაციულ-სამართლებრივი ფორმების მიხედვით:

სასტუმროების და სასტუმროს ტიპის დაწესებულებების 99.3% კერძო საკუთრებაში იყო, ხოლო 0.7% - სახელმწიფო საკუთრებაში.

2021 წელს საქართველოში მოქმედი სასტუმროებისა და სასტუმროს ტიპის დაწესებულებების საერთო ფართობი 2.7 მლნ კვადრატულ მეტრს შეადგენდა, რაც 49.2%-ით მეტია 2020 წლის შესაბამის მაჩვენებელზე. აქედან იჯარით გაცემული იყო 65.4 ათასი კვადრატული მეტრი, ხოლო ყველა ნომრის საცხოვრებელი ფართობი 1.3 მლნ კვადრატულ მეტრს შეადგენდა, რაც 59.3-ით არის გაზრდილი წინა წლის შესაბამის მაჩვენებელთან შედარებით.

2021 წელს მოქმედ სასტუმროებსა და სასტუმროს ტიპის დაწესებულებებში ადგილების საერთო რაოდენობამ 87.8 ათასი შეადგინა, რაც 51.7 %-ით მეტია 2020 წლის შესაბამის მაჩვენებელზე. ნომრების საერთო რაოდენობა გაიზარდა 60.2 %-ით და 43.1 ათასი შეადგინა.

 ამ პერიოდში საქართველოს სასტუმროები და სასტუმროს ტიპის დაწესებულებები 3.1მლნ სტუმარს მოემსახურა, რაც 127%-ით მეტია წინა წლის შესაბამის მაჩვენებელზე. სტუმართა 43.5%-ს უცხოელები წარმოადგენდნენ. მათგან 10.4% რუსეთის ფედერაციაზე მოდის, 9.5 % - უკრაინაზე, ხოლო 9.5 % - არაბთა გაერთიანებულ ემირატებზე. ევროკავშირის ქვეყნების წილი უცხოელი სტუმრების 10.1%-ს შეადგენს, რომელთა შორის 34.6%-ს გერმანიის, ხოლო 33.0%-ს პოლონეთის მოქალაქეები წარმოადგენენ.

 ქვემოთ მოცემული დიაგრამა ასახავს 2020-2021 წლებში სასტუმროებსა და სასტუმროს ტიპის დაწესებულებებში უცხოელი სტუმრების რაოდენობის განაწილებას ქვეყნების მიხედვით:

2021 წელს საზღვარგარეთის ქვეყნებიდან საქართველოს სასტუმროებსა და სასტუმროს ტიპის დაწესებულებებს უმეტესად სტუმრობდნენ რეკრეაციისა და დასვენების მიზნით (71.6%).

 ამ პერიოდში,საქართველოს სასტუმროებსა და სასტუმროს ტიპის დაწესებულებებში დასაქმებული იყო 18 283 ადამიანი, რომელთა უმეტესობას (56.6%) ქალები წარმოადგენდნენ.