თბილისი (GBC) - ,,დუგლაძეების ღვინის კომპანიის’’ თანამფლობელი ზაზა დუგლაძე ამბობს, რომ მიუხედავად უკრაინის ბაზრის დაკეტვისა, ღვინის კომპანიები საექსპორტო პროდუქციას სხვა ქვეყნებზე გადაანაწილებენ. მიუხედავად იმისა, რომ ბოლო 5 წელიწადში ღვინის ექსპორტის მოცულობა ვიწრო დიაპაზონში მერყეობს, ზაზა დუგლაძე GBC-სთან საუბარში ამბობს, რომ რეკორდული მოსავალს ალტერნატიულ ბაზრებზე გაიტანენ. მაგალითად: აზიურ ბაზარზე, ამერიკასა და ბრიტანეთში.

დუგლაძის განცხადებით, 90 თეთრი ყურძნის მინიმალური ღირებულება იქნება. შესაძლოა ხარისხიანი რქაწითლის ფასი 1.1 ლარსაც კი ასცდეს.

2018 წლიდან 2022 წლის იანვარ-ივნისის პერიოდებში საქართველოდან ექსპორტირებული ღვინის რაოდენობა 28.5 მლნ ლიტრიდან 34.1 მლნ ლიტრამდე მერყეობს.

2022 წელს საექსპორტო 1 ლიტრი  ქართული ღვინის ფასი საშუალოდ 2.9 დოლარია.

საქართველოს პრემიერ–მინისტრმა ირაკლი ღარიბაშვილმა მთავრობის ორშაბათის სხდომაზე განაცხადა, რომ მთავრობის გადაწყვეტილებით, რთვლის სუბსიდირება წლევანდელ სეზონზეც განხორციელდება და 1 კგ თეთრი ყურძნის ფასი მინიმუმ 90 თეთრი იქნება.

აღნიშნული სუბსიდიისთვის მთავრობა 150 მლნ ლარს გამოყოფს. წელს მთავრობა რეკორდულ 300 000 ტონა მოსავალს ელოდება. ამ პროგნოზის გამართლების შემთხვევაში 1 კგ ყურძენზე სუბსიდიის მოცულობა 0,5 ლარს შეადგენს.