თბილისი (GBC) - საქართველოს საფინანსო ინსტიტუტების საბარათე მოწყობილობების რაოდენობა 2018 წლის იანვრიდან მიმდინარე წლის ივნისამდე ჯამში 60 412 ერთეულით გაიზარდა და 96 253 მოწყობილობა შეადგინა.

საქართველოს ეროვნული ბანკის (სებ) მონაცემებით, ამავე პერიოდში გაზრდილია ბანკომატების, გადახდის პოს–ტერმინალების და ელ. კომერციის ტერმინალების რაოდენობა. შემცირებულია პროვაიდერების პოს–ტერმინალების რიცხვი.

კერძოდ, ბანკომატების რაოდენობა თუ 2018 წლის იანვარში 2 214 ერთეული იყო, მიმდინარე წლის ივნისში ამ მაჩვენებელმა 2 882 შეადგინა.

სებ–ის მონაცემებით, გაცილებით შთამბეჭდავია გადახდის პოს–ტერმინალების რაოდენობის ცვლილება – თუ 2018 წლის იანვარში მათი რიცხვი მხოლოდ 31 436–ს შეადგენდა, ივნისში ამ მაჩვენებელმა თითქმის სამჯერ მეტი – 83 197 ერთეული შეადგინა.

ასევე შთამბეჭდავია ელ. კომერციის ტერმინალების რაოდენობის ზრდა – 2018–ის იანვარი – 771 ერთეული, 2022–ის ივნისი – 9 042.