თბილისი (GBC) - საქართველოს ეროვნული ბანკის თანახმად, 2022 წლის ივლისში ოფიციალური საერთაშორისო რეზერვები წლიურად 7.3%-ით გაიზარდა და 4.2 მლრდ აშშ დოლარი შეადგინა. ამასთან, წინა თვესთან შედარებით რეზერვების ზრდამ 6.0% (+234.3 მლნ აშშ დოლარი) შეადგინა. სებ-მა Bmatch-ის პლატფორმის საშუალებით 110 მლნ აშშ დოლარი შეიძინა ივლისში. რეზერვების სხვა ცვლილება უკავშირდება მთავრობის და საბანკო სექტორის სავალუტო ოპერაციებს, და/ან აქტივების გადაფასებას. ამის შესახებ გალტ & თაგარტის კვირის მიმოხილვაშია ნათქვამი.

მიმოხილვის თანახმად, 2022 წლის 10 აგვისტოს, ეროვნულმა ბანკმა სავალუტო აუქციონზე 40.0 მლნ აშშ დოლარი იყიდა. აღსანიშნავია, რომ წლის დასაწყისიდან დღემდე სებ-ი უცხოური ვალუტის წმინდა მყიდველია, რომელმაც 211.6 მლნ აშშ დოლარი შეადგინა და ამავე პერიოდში ლარი აშშ დოლარის მიმართ 12.3%-ით არის გამყარებული.