თბილისი (GBC) - წელს საქართველოში ვაშლი უხვ მოსავალს ელიან, თუმცა უამინდობამ და ხშირმა წვიმებმა ვაშლის ხარისხზე მნიშვნელოვანი გავლენა იქონია.

მთლიანობაში გარემოს დაცვისა და სოფლის მეურნეობის სამინისტრო სეზონზე 135 ათას ტონამდე მოსავლის მიღებას პროგნოზირებს. ოთარ შამუგია ვაშლის გადამმუშავებელი და კონცენტრატის მწარმოებელი კომპანიების წარმომადგენლებს შეხვდა.

როგორც მინისტრმა აღნიშნა, უმნიშვნელოვანესია, მეწარმეებთან და სექტორის ყველა  რგოლთან აქტიური კომუნიკაცია, რათა ზუსტად განისაზღვროს საჭიროებები და  მიმდინარე პროცესების სწორი ანალიზით მოხდეს გადაწყვეტილებების მიღება.

როგორც სამინისტროში ამბობენ, ვაშლის მოსავლის აღება-დაბინავება-რეალიზაციის პროცესის შეუფერხებლად უზრუნველსაყოფად,  უახლოეს მომავალში, შეჯერებული გადაწყვეტილება იქნება მიღებული.

გადამმუშავებელი საწარმოები, კონცენტრატის  წარმოებისთვის, დაახლოებით 50 ათასი ტონა ვაშლის ჩაბარებას გეგმავენ. კომპანიები ვაშლის მიღებას, სავარაუდოდ, სექტემბრის დასაწყისიდან დაიწყებენ.