თბილისი (GBC) - ბაზარზე ადგილობრივმა საზამთრომ იმპორტი ჩაანაცვლა, თუმცა ქართველი ფერმერები დაბალ ფასზე მიათითებენ.

EastFruit-ის ცნობით, ივლისში ივნისთან შედარებით საზამთროს იმპორტი მნიშვნელოვნად, 8,5 ათასი ტონიდან 0,7 ათას ტონამდე შემცირდა.

პორტალი წერს, რომ ფერმერები კილოგრამ ქართულ საზამთროზე 0,10 დოლარს იღებენ, რაც ისტორიაში ყველაზე დაბალი ფასია. საზამთრო გაიაფდა ასევე ბელორუსში, მოლდოვაში, პოლონეთსა და სხვა ქვეყნებში, თუმცაფერმერების შემოსავალი ყველაზე დაბალი საქართველოსა და უზბეკეთშია ($0.10/კგ-ზე დაბალი), სხვა ქვეყნებში საშუალო ფასი $0.15-0.55-ის ფარგლებში მერყეობს.

საქართველოდან საზამთრო ექსპორტზე არ გადის, რაც საექსპორტო ხარჯების ზრდის არის განპირობებული. ივნის-ივლისში სულ ქართული საზამთროს ექსპორტმა 0,4 ათასი ტონა შეადგინა, რაც თითქმის უმნიშვნელოა წარმოების მოცულობასთან შედარებით, რომელიც 60 ათას ტონას აჭარბებს.