თბილისი (GBC) - აჭარის საავტომობილო გზების დეპარტამენტის მიერ გამოცხადებულ ელექტრონულ ტენდერში შპს ,,ბონდი-2009’’ ერთადერთი პრეტენდენტია.

დეპარტამენტმა 7.7 მლნ ლარის ტენდერი გამოაცხადა, რომელიც სამშენებლო სამუშაოებს, გზატკეცილების საფარის დაგებას, მოკირწყვლასა და მოასფალტებას, ასევე მდინარის ნაპირსამაგრ სამუშაოებს მოიცავს.

უფრო ზუსტად კი საავტომობილო/გზა "ჭოროხის გზა (მახოს ხიდი-გონიოს ხიდი)" კმ0+000-კმ5+700 მონაკვეთზე, ასფალტბეტონის საფარის მოწყობას (4.7 მლნ ლარი), მდ. ჭოროხის მარჯვენა სანაპიროზე ნაპირსამაგრი ნაგებობის მოწყობას (3 მლნ ლარი).

კომპანია ,,ბონდი-2009’’ ზემოთ აღნიშნულ ყველა სამუშაოს  20%-ით დაბალ ფასად (6.1 მლნ ლარში) შეასრულებს.

წინადადებების მიღება დასრულებულია.

სატენდერო დოკუმენტაციის მიხედვით, კანდიდატს 270 კალენდარული დღე აქვს პროექტის დასასრულებლად. სამუშაო 9 ეტაპად არის დაყოფილი, პირველი 3 ეტაპი უნდა განხორციელდეს 2022 წელს, ხოლო დანარჩენი 6 ეტაპი 2023 წლის ივნისამდე.

კომპანია ,,ბონდი-2009’’ 2009 წელს დაარსდა. ტენდერების მონიტორის მიხედვით, კომპანიას 215 ტენდერში აქვს მონაწილეობა მიღებული და აქედან 108-ში გაიმარჯვა. მოგებული ტენდერების საერთო სავარაუდო ღირებულება კი 113.5 მლნ ლარია.

კომპანიის მფლობელთა სტრუქტურა კი ასეთია:

ბადრი ჭაღალიძე - 25%;

ოთარ ფუტკარაძე - 25%;

ნუკრი დოლიძე - 25%;

დავით დევაძე - 25%.