თბილისი (GBC) - ორშაბათის სავაჭრო დღის ბოლოს მსოფლიო ბაზარზე ნავთობი მკვეთრ ვარდნაშია და თბილისის დროით 17:10 საათისთვის ეტალონური მარკები საშუალოდ 4%–ზე მეტს კარგავენ. რუსული ნავთობი 2,5–ჯერ სწრაფად ვარდება და ფასში 10,1%–ს კარგავს.

კერძოდ, Brent–ის მარკის ნავთობის ფასი ლონდონის ბირჟაზე ამ დროისთვის 3,74%–ს კარგავს და მისი ფასი ბარელზე $100–მდეა ჩამოსული.

ამერიკული WTI მინუსშია 4,77%-ით და ბარელი $94 ნიშნულზე ივაჭრება.

რუსული Urals მინუს 10,1%–შია და ბარელის ფასი $78,41–ს შეადგენს.

ანალიტიკოსები ნავთობის ფასის ვარდნას, რაც პარასკევის მკვეთრი ზრდის შემდეგ შეინიშნება, იაპონიიდან და ჩინეთიდან გავრცელებულ არასაიმედო ინფორმაციას უკავშირებენ, რაც სამრეწველო სექტორში საქმიანო აქტივობის ინდექსის დაწევას გულისხმობს.