თბილისი (GBC) - საქართველოში 2022 წლის იანვარ-ივნისში გაცემულია 5 086 სამშენებლო ნებართვა (+15.6% Y.Y) 3.2 მლნ კვ.მ ფართობის შენობა-ნაგებობების მშენებლობაზე (წინა წლის შესაბამის პერიოდთან შედარებით 7.9 პროცენტით მეტი). ამის შესახებ ინფორმაციას საქსტატი ავრცელებს.

საქსტატის მონაცემებით, ნებართვების 77.3%  მოდის ქვეყნის 4 რეგიონზე, კერძოდ, ჩასატარებელი სამშენებლო სამუშაოების 52.1% მოდის ქ. თბილისზე, 10.7% - მცხეთა-მთიანეთის რეგიონზე, 7.9% - ქვემო ქართლის რეგიონზე, 6.6% - იმერეთის რეგიონზე.

იანვარ-ივნისში ნებართვები გაიცა მრავალფუნქციური საცხოვრებელი კომპლექსების, სავაჭრო ობიექტების, სასტუმროების, სამრეწველო საწარმოების, სასოფლო-სამეურნეო დანიშნულების ობიექტებისა და სხვა შენობა-ნაგებობების მშენებლობაზე.

გაცემულ ნებართვებში შედარებით დიდი წილით წარმოდგენილია მრავალფუნქციური საცხოვრებელი კომპლექსები. 2022 წლის იანვარ-ივნისში ექსპლუატაციაში მიღებულ იქნა 1.2 მლნ კვ.მ ფართობის (+52.3% Y.Y) 1 168 ობიექტი (+3.5% ).

დამთავრებული მშენებლობების ნახევარზე მეტი მოდის ქვეყნის 3 რეგიონზე. კერძოდ, 39.4% მოდის თბილისზე, 12.7% - კახეთის რეგიონზე, 10.1% - მცხეთამთიანეთის რეგიონზე.