თბილისი (GBC) - ირანში მსოფლიოში უდიდესი გაზის საბადოს „სამხრეთ სპარსეთი“ ჩრდილოეთით დიდი მოცულობის ახალი საბადო გახსნეს, რომლიდანაც, წინასწარი მონაცემებით, 1 ტრლნ მ³ გაზის მოპოვებას ვარაუდობენ.

ირანის პარლამენტის ენერგეტიკული კომისიის თავმჯდომარემ მალიკ შარიატი ნიასერმა განაცხადა, რომ გაზის ახალ საბადოზე ამ მომენტში დაზვერვითი სამუშაოები ტარდება. მისივე თქმით, წინასწარი მონაცემებით, გაზის საბადოს მოცულობა 1 ტრლნ მ³–ს შეადგენს.

„სამხრეთ სპარსეთის“ მარაგები მსოფლიო გაზის მარაგის 8%, ხოლო ირანის მთელი მოპოვების 50%–ს შეადგენს. საწვავი ევროპის ქვეყნებსა და ინდოეთში გადის. საბადოს დამუშავებაში მონაწილეობენ რუსული გაზპრომი, იტალიური Eni და ფრანგული Total.