თბილისი (GBC) – თამბაქოს ნაწარმის კომპანია Philip Morris International რუსეთის ბაზრის დატოვებას 2022 წლის ბოლომდე გეგმავს, განაცხადა მისმა აღმასრულებელმა დირექტორმა იაცეკ ოლჩაკმა. მისი თქმით, „ეს საკმაოდ რთული პროცესია“.

Bloomberg-თან ინტერვიუში ოლჩაკმა განმარტა, რომ კომპანიისთვის რუსეთის ბაზარი საშუალო სიდიდისაა. რუსეთის ბაზარზე კომპანიის პროდუქციას 27% უჭირავს.

„ჩვენ გულმოდგინედ ვმუშაობთ იმაზე, რომ შევწყვიტოთ ჩვენი ყოფნა რუსულ ბაზარზე. ვფიქრობ, ეს მომდევნო კვარტალში მოხდება. ჩემი აზრით, რუსეთის ბაზრიდან გასვლას წლის ბოლოსთვის შევძლებთ“, – თქვა მან.

2021 წელს Philip Morris–ის მთლიანი წარმოების 10% მოდიოდა რუსეთის ბაზარზე. 24 თებერვლის შემდეგ, რაც რუსეთი უკრაინაში შეიჭრა, კომპანიამ შეამცირა რუსულ ბაზარზე მიწოდებები და შეწყვიტა ქვეყანაში ინვესტირება.