თბილისი (GBC) - ევროკავშირი რუსულ სბერბანკს სანქციებს გაუმკაცრებს, წერს სააგენტო Reuters დოკუმენტის პროექტზე დაყრდნობით.

ევროკავშირის წარმომადგენელმა, რომელმაც ვინაობის გამხელა არ ისურვა, ისიც განაცხადა, რომ სბერბანკის შავ სიაში შეყვანის შემდეგ დასავლეთის ქვეყნებში მისი აქტივები გაიყინება. ასევე ბანკს ნებისმიერი ტრანზაქციების შესრულება აეკრძალება, გარდა სურსათითა და სასუქებით ვაჭრობისა.

როგორც მოსალოდნელია, ახალი სანქციები 9 ორგანიზაციასა და 48 ფიზიკურ პირზე გავრცელდება, მათ შორის ურალის სამთო–მეტალურგიული კომბინატის გენერალურ დირექტორზე ანდრეი კუზიცინზე.

გავრცელებული ინფორმაციით, ევროკავშირის სანქციებში მოექცევა ასევე რუსული მოტოკლუბი „ღამის მგლები“ და მისი ლიდერები.